Green Tomato: వంటింట్లో నిత్యం లభించేవి కూరగాయలు. వాటిలో ముఖ్యమైనది టమాటా. దాదాపు అన్ని కూరల్లోనూ టమాటా విరివిగా వినియోగిస్తారు. టమాటా లేనిదే ఏ కూర అయినా అసంపూర్తిగా ఉంటుందని చెబుతారు. ఇంట్లో వండే వంటలకైనా, బయట ఫాస్ట్‌ ఫుడ్‌ సెంటర్లలోనైనా టమాటా ఉండి తీరాల్సిందే. అయితే, ఎక్కువ మంది టమాటాలు కాస్త ఎరుపు రంగులోకి వచ్చాక వినియోగిస్తుంటారు.
కానీ, పచ్చి టమాటాలను ఎప్పుడైనా తిని చూశారా? ఇదేం ప్రశ్న.. గ్రీన్ కలర్‌లో ఉండే టమాటాలను ఎలా తింటారు.. కాస్త ఎరుపు రంగులోకి మారాక వంటలకైనా, లేదా సాస్‌కు అయినా వినియోగిస్తుంటారు కదా.. అని సమాధానం వస్తుంది. అయితే పచ్చి టమాటాల్లో పోషకాలు ఎక్కువగా ఉంటాయని నిపుణులు చెబుతున్నారు. పచ్చి టమాటాలు తినడం వల్ల అనేక లాభాలున్నాయని స్పష్టం చేస్తున్నారు.
పచ్చి టమాటాలో విటమిన్ ఏ, సీ, కాల్షియం, పొటాషియం తదితరాలు పుష్కలంగా ఉంటాయి. ఇవి శరీరానికి ఎంతో ప్రయోజనం చేకూరేలా చేస్తాయి. పచ్చి టమాటా తీసుకోవడం వల్ల రోగనిరోధక శక్తి పెరుగుతుంది. పచ్చి టమాటాలను క్రమం తప్పకుండా తింటే శరీరానికి విటమిన్ సీ పుష్కలంగా లభిస్తుంది. ఇది రోగనిరోధక శక్తిని పెంచడానికి ఉపయోగపడుతుంది. ముఖ్యంగా వాతావరణంలో మార్పులు వచ్చినప్పుడు జలుబు, దగ్గు, జ్వరం రాకుండా రక్షణ ఇస్తుంది.
కళ్ల ఆరోగ్యం కోసం..
కళ్ల ఆరోగ్యం కోసం గ్రీన్ టమాటాలను రెగ్యులర్ డైట్‌లో తప్పనిసరిగా చేర్చుకోవాలని నిపుణులు సూచిస్తున్నారు. ఇందులో బీటా కెరోటిన్ ఉండటం వల్ల కళ్ల ఆరోగ్యానికి ఎంతో మేలు చేస్తుందని చెబుతున్నారు. దీని వల్ల కంటి పనితీరు సక్రమంగా జరుగుతుంది. కంటి చూపు పెరుగుతుంది. దాంతోపాటు రక్తపోటును నియంత్రించే శక్తి పచ్చి టమాటాలకు ఉందని చెబుతున్నారు.
