Health : జీవనశైలి కారణంగానే చాలా వ్యాధులు చుట్టుముడుతుంటాయి. అందులో థైరాయిడ్ కూడా ఒకటి. థైరాయిడ్ ఒక వ్యాధి కాదు జీవనశైలి రుగ్మత. జీవనశైలి మార్పులు, చెడు ఆహారపు అలవాట్ల కారణంగా ఈ రోజుల్లో చాలా మంది థైరాయిడ్ సమస్యతో బాధపడుతున్నారు. పురుషుల కంటే స్త్రీలకు థైరాయిడ్ సమస్యలు ఎక్కువగా ఉంటుంది. థైరాయిడ్ అన్నది సీతాకోక చిలుక ఆకారంలో కంఠం వద్ద ఉండే ఒక ఎండోక్రైన్ గ్లాండ్. శరీరంలోని మెడ భాగంలో సీతాకోక చిలుక ఆకారాన్ని పోలి ఉండే గ్రంధి థైరాయిడ్.
ఈ రుగ్మత రెండు రకాలు. థైరాయిడ్ గ్రంధి హార్మోన్ ఉత్పత్తి మందగించడాన్ని హైపోథైరాయిడిజం అంటారు దీనికి ఫలితంగా శరీరంలోని జీవక్రియలు కూడా మందగిస్తాయి. హైపోథైరాయిడిజం ఉన్న వ్యక్తి బరువు పెరుగుతాడు. రెండోది హైపర్ థైరాయిడిజం. ఇది థైరాయిడ్ గ్రంధి హార్మోన్లను ఎక్కువగా ఉత్పత్తి చేస్తుంది. హైపర్ థైరాయిడిజం ఉంటే ఆ వ్యక్తి బరువు తగ్గుతాడు.
థైరాయిడ్ హార్మోను సవ్యంగా విడుదలైనప్పుడే శరీరంలో ప్రతి కణం సరిగ్గా పనిచేసి, జీవక్రియ పనితీరు బాగుంటుంది. ఆ హార్మోన్ విడుదలలో ఎప్పుడైతే సమతుల్యం లోపిస్తుందో అప్పుడు సమస్యలు తప్పవు. T3, T4, TSH అనే హార్మోన్ల ఉత్పత్తిలో తేడాల వల్ల థైరాయిడ్ గ్రంథి పనితీరు వేగంగా లేక నెమ్మదిగా పనిచేస్తుంది.
ఆయుర్వేదం ప్రకారం థైరాయిడ్ శరీరంలో వాత, కఫ దోషాల పెరుగుదల కారణంగా సంభవిస్తుంది. ఈ రెండు దోషాలు మానవ శరీరంలోని శారీరక, మానసిక ప్రక్రియలను నియంత్రించే జీవ శక్తులు. శరీరంలో ఈ దోషాల అసమతుల్యత థైరాయిడ్‌కు దారితీస్తుంది. శరీర జీవక్రియలను సమతుల్యం చేయడం. థైరాక్సిన్ హార్మోన్ ప్రసరణను సరిచేయడం ద్వారా థైరాయిడ్‌ను నియంత్రించవచ్చని ఆయుర్వేదం దీనిలో ఎంతో సహాయపడుతుంది.
ఆయుర్వేదం థైరాయిడ్ రోగులకు థైరాయిడ్‌ను నియంత్రించడానికి ఇంట్లోనే సాధన చేయగల కొన్ని సులభమైన నివారణలను అందిస్తుంది. శరీరంలో థైరాక్సిన్ హార్మోన్ ప్రసరణను మెరుగుపరచడానికి ఆయుర్వేదం కొన్ని చిట్కాలను తెలిపింది. మీరు థైరాయిడ్ పేషెంట్ అయితే, మీ శరీరంలో వాతాన్ని పెంచే ఆహారాన్ని తీసుకోకూడదు. అరటిపండ్లు, బచ్చలికూర, బీన్స్, చిక్కుళ్ళు వంటి ఫైబర్ అధికంగా ఉండే ఆహారాన్ని తీసుకోవాలి.
థైరాయిడ్ యొక్క అత్యంత సాధారణ లక్షణాలలో ఒకటి బరువు పెరగడం. ఈ బరువు పెరుగడాన్ని థైరాయిడ్‌ను నియంత్రించడానికి, కఫాన్ని శాంతింపజేసే ఆహారం తీసుకోవాలని చెబుతారు ఆయుర్వేద వైద్యులు. తాజా కూరగాయలు, పండ్లు, గింజలు, బీన్స్ వంటి ఆరోగ్యకరమైన ఆహారాలు తీసుకోవాలి. రోజుకు కనీసం ఒక పండు తినడానికి ప్రయత్నించాలి.
ప్రాణాయామం సాధన చేయండి. ప్రాణాయామం అనేది శ్వాసను నియంత్రించే యోగాభ్యాసం. థైరాయిడ్ రోగులు ప్రాణాయామం సాధన చేయాలని సూచిస్తారు ఆయుర్వేద వైద్యులు. ఇది శరీరంలోని వాతాన్ని సమతుల్యం చేస్తుంది. తద్వారా థైరాయిడ్ సమస్యను నియంత్రించడంలో సహాయపడుతుంది.
మార్నింగ్ వాక్ కోసం వెళ్ళండి. హార్మోన్ల అసమతులత్యను నివారించడానికి మార్నింగ్ వాక్ చేయడం తప్పనిసరి అలవాటుగా చేసుకోవాలి. నువ్వుల నూనెతో మసాజ్ చేయడం వలన మంచి ఫలితం ఉంటుంది. శరీరం నుండి అదనపు కొవ్వును తగ్గించడంలో మసాజ్ సహాయపడుతుంది.
ఆయుర్వేద పద్ధతులు సాధారణంగా సహజ నివారణలను ఉపయోగించి చికిత్స చేస్తారు. ఈ సహజ నివారణలు సాధారణంగా వంటగదిలో అందుబాటులో ఉంటాయి. థైరాయిడ్ స్థాయిలను నియంత్రించడానికి ప్రయత్నిస్తున్నట్లయితే కొంచెం త్రిఫల, మెంతి, అల్లం ఇంకా కలబందను తీసుకోవచ్చు. ఈ పదార్థాలు థైరాయిడ్ రోగులకు నిజంగా ఓ వరం అని చెబుతారు ఆయుర్వేద వైద్యులు. థైరాయిడ్ పేషెంట్ కాఫీ, టీలకు బదులు హెర్బల్ టీ తీసుకోవడం ఉత్తమం అని ఆయుర్వేద నిపుణుల సలహా.
